စာအုပ်အညွှန်း - အိုဘယ့်အစိမ်းတို့မြေ
"စာအုပ်အညွှန်း"
အားလုံးပဲ မင်္ဂလာပါ။
ကျနော်တို့ Mawlamyine University Readers' Club ကနေပြီးတော့ ပိတ်ရက်တွေမှာ ဖတ်ချင်စရာကောင်းတဲ့ စာအုပ်တွေကို ပြောပြဝေမျှပေးသွားမယ့် စာအုပ်အညွှန်း အစီအစဉ်လေး တခု လုပ်ထားပါတယ်။
အခုပြောပြမယ့် စာအုပ်က ဆရာသင့်လူရဲ့ ဘာသာပြန်စာအုပ်တအုပ်ဖြစ်တဲ့ " အိုဘယ့် အစိမ်းတို့မြေ " ဆိုတဲ့ စာအုပ်ပါ။
ဒီစာအုပ်ဟာဆိုရင် မြန်မာနိုင်ငံဖွား ကယန်းတိုင်းရင်းသားတစ်ဦးဖြစ်သူ ပါစကယ်ခူးသွယ် ရဲ့ From the Land of Green Ghosts စာအုပ်ကို ဆရာ သင့်လူ က အိုဘယ့်အစိမ်းတို့မြေ ဆိုတဲ့ အမည်နဲ့ ဘာသာပြန်ဆိုထားတဲ့ ဘာသာပြန်စာအုပ်ကောင်းတစ်အုပ်ပါ။ ငါတို့စာပေ တိုက်ထုတ်ဖြစ်ပြီး တန်ဖိုး ၄၅၀၀ ကျပ်ပါဗျ။ စာမျက်နှာက ၃၈၁ မျက်နှာပါဝင်ပါတယ်။
မူရင်းစာအုပ်ဟာဆိုရင် ၂၀၁၂ ခုနှစ် တောင်အာရှ အကောင်းဆုံးစာပေဆုရ စာအုပ်ဖြစ်ပြီး ဒီစာအုပ်ကို အပိုင်းသုံးပိုင်းခွဲရေးသားထားပါတယ်ဗျ။
ပထမပိုင်းမှာ စာရေးသူရဲ့ ဇာတိနဲ့ ငယ်ဘဝ ကို ဖော်ပြထားပြီး စာရေးသူရဲ့ ဇာတိမြေက ရိုးရာတွေ၊ အယူအဆတွေ၊ တောင်တန်းဒေသနဲ့ ပြည်မအဆက်အသွယ် ခက်ခဲချိန်ကာလက အကြောင်းအရာတွေကို စိတ်ဝင်တစား တွေ့ရမှာပါ။
ဒုတိယပိုင်းမှာတော့ မန္တလေးရောက်လာတဲ့ တောင်ပေါ်သား စာရေးသူရဲ့အကြောင်း၊ မတည်မငြိမ်ဖြစ်နေတဲ့ တိုင်းပြည်အခြေအနေ၊ ရှစ်လေးလုံးအရေးအခင်းနဲ့ တော်လှန်ရေးကာလ အဖြစ်အပျက်များ ကို တွေ့မြင်ရမှာပါ။
တတိယပိုင်းက ထိုင်း-မြန်မာနယ်စပ်က တော်လှန်ရေးကျောင်းသားဘဝ၊ အင်္ဂလန်နိုင်ငံကို ရောက်ရှိသွားပြီးနောက်ပိုင်း စာရေးသူရဲ့ ဘဝအကြောင်း တွေပါဝင်ပါတယ်။
ဆရာသင့်လူရဲ့ ဘာသာပြန်ဆိုမှုတွေကလည်း
သွက်သွက်လက်လက်ရှိတာမို့ ဖတ်ရင်းပျင်းသွားတာမျိုးမရှိဘဲ လက်ကမချချင်လောက်အောင် ဆွဲဆောင်သွားနိုင်တဲ့ စာအုပ်တစ်အုပ် ဖြစ်တာကြောင့် ကျနော်ရေးသားဖော်ပြထားတဲ့ အကြောင်းအရာတွေကို စိတ်ဝင်စားသူတွေအနေနဲ့ မဖတ်ရသေးရင် ဖတ်ဖြစ်အောင် ဖတ်ကြည့်ကြဖို့ အကြံပေးပါတယ်။
စာအုပ်အညွှန်းရေးသားသူ - Teddy
Comments
Post a Comment