တို့များရိုးရာ တို့ရိုးရာ

"တို့များရိုးရာ တို့ရိုးရာ"

ကျွန်တော်စဥ်းစားမိသည်မှာ ကြာပေပြီ။ သို့ပေမယ့် ဤစာကို ရေးမည် ရေးမည်နှင့် ချိန်နေရင်းပင် ကာလအတန်ကြာခဲ့ရ၏။ ခုတော့ ရေးဖြစ်အောင် ရေးလိုက်ပါတော့သည်။  ကိုယ့်ပေါင်ကိုယ်လှန်ထောင်းရာများ ကျနေမလားလို့တွေးမိသေးသည်။ကျွန်တော့်မှာရွေးချယ်စရာမရှိပါ။

မိမိကြုံတွေ့ဖြတ်သန်းနေရတဲ့ ခေတ်အခြေအနေ နိုင်ငံရေး၊စီးပွားရေး၊လူမှုရေး စတာတွေကို စာဖတ်သူတို့အား အနုပညာမြောက်စွာ​ ရေးသားဖော်ပြရမည်မှာ ကျွန်တော်တို့စာရေးသူများ၏ မဟာတာဝန်ကြီးမဟုတ်ပါလား။

နားလည်မှု —

          ကျွန်တော်တို့ ရွှေမြန်မာအများစုသည်"နားလည်မှု" ဆိုသည့် သက်မဲ့စကားလုံးတစ်လုံးကို ဘက်လိုက်မှု နှင့် စည်းမဲ့ကမ်းမဲ့နိုင်မှု အတွက် အမြဲလိုလို သုံးစွဲနေကြသည်ကို မြင်ရ၏။ တွေ့ကြရပါသည် ။ အထူးသဖြင့် တရားရေးရာကိစ္စများ ၊လုပ်ငန်းခွင်များ စာတာတွေမှာ အမြဲတွေ့နေကြရသည် ။ နားလည်မှုဆိုသည့် စကားလုံးကို ဘက်လိုက်မှု(သို့မဟုတ်) စည်းမဲ့ကမ်းမဲ့နိုင်မှုအနေဖြင့် မှားယွင်းစွာ မှတ်ယူကျင့်သုံးနေသည့် ကျွန်တော်တို့ရွှေမြန်မာများ၏ ရိုးရာအမှားကြီး ကိုမပြောင်းလဲသရွေ့ ကျွန်တော်တို့အနာဂတ်သည် အမည်းရောင်သာ သန်းနေပေလိမ့်ဦးမည်။ မူတွေကို ပြောင်းလဲလိုက်သလိုဘဲ ရိုးရာကလေးကိုလည်း ပြောင်းလဲနိုင်ပါမှ အနာဂတ်ဆိုသည့်အရာကို ခြေလှမ်းမိမည်ဖြစ်သည်။ 

မြန်မာစကားသည် သူ့အဓိပ္ပါယ်နှင့်သူရှိရာ နားလည်မှုဟူသည် ဘက်လိုက်မှု မဟုတ်သလို ဘက်လိုက်မှုသည်လည်း နားလည်မှု မဟုတ်တန်ရာဟု နှလုံးသွင်းထားဖို့ အင်မတန်မှ အဓိကကျလှပေသည်။အိုးစည်တီးသံသည် ဒိုးပတ်သံ မဟုတ်သလို ဒိုးပတ်တီးသံသည်လည်း အိုးစည်သံမမည်တန်ရာပေ။တူရိယာသည် သူ့အသံနှင့်သူ တိကျစွာ ရှိနေသလို စကားလုံးတိုင်း၏ အဓိပ္ပါသည်လည်း သူ့နေရာနှင့်သူ တသီးတခြားတည်ရှိနေသည်။ ရောချ၍မသင့်။ သို့ဖြစ်ရာ နားလည်မှုနှင့် ဘက်လိုက်မှု (သို့မဟုတ်) စည်းကမ်းမဲ့မှုကို ရောချနေကြခြင်းသည် ကျွန်တော်တို့ သခင်မျိုးဟုခံယူထားသော ရွှေမြန်မာများ၏ ရိုးရာတစ်ခုပင်ဖြစ်၍နေလေသည်မှာ အားလုံးမျက်မြင်ပင် အထင်အရှားတွေ့နေရသည်။ ထိုရိုးရာကို ကျွတော်တို့စိတ်ထဲမှစ၍ အပြုအမူအထိ လိုလိုချင်ချင်နှင့် ပြင်ဆင်နိုင်ပါမှ တိကျရေရာ၍ မျှတသင့်တင့်သော နိုင်ငံ့အနာဂတ်ဟူသော ရောင်နီတန်းသည် မြန်မာ့မြေသို့လွှမ်းခြုံလာနိုင်ပေလိမ့်မည်ဟု ကျွန်တော်ယုံကြည်မိသည်။ မျှော်လည်းမျှော်လင့်မိပါသည်။

စကားကြောရှည်ခြင်း —

          Covid-19 နှင့်ပတ်သက်၍ ကာကွယ်တားဆီးရေး ဆိုင်ရာ အမိန့်စာများ အမိနိုင်ငံတော်၏ သက်ဆိုင်ရာ ဝန်ကြီးဌာနမှ ထွက်လာသည်။ တွေ့ကြရပါသည်။ အမိန့်စာသည် သြဘာစာနှင့်တူလှသည်။ မတိကျ ၊မပြတ်သား။

စကားကြောရှည်လှသည်။ အမိန့်စာ၏သဘောသည် ဒိုးဒိုးဒေါက်ဒေါက်နှင့် ပြတ်ပြတ်သားသားဖြစ်နေရပေမည်မဟုတ်

ပါလား။ သြဘာစာ မှသာလျှင် စကားကြောရှည်ရမည်ဖြစ်ရာ 

အမိန့်စာနှင့် သြဘာစာကိုကွဲကွဲပြားပြားသိထားသင့်ကြလှပေသည်။

သို့သော် အပြစ်မတင်မိ ။ မလိုအပ်သည့်နေရာ၌ စကားကြောရှည်တတ်ကြခြင်းသည်ပင်လျှင် ကျွန်တော်တို့ရွှေမြန်မာများ၏ ရိုးရာအစဥ်အလာတစ်ခု ဖြစ်နေသည် မဟုတ်ပါလား။ ထို့ကြောင့်လည်း ဆရာကြီးပီမိုးနင်းက ဆိုခဲ့သည်။

"မြန်မာဘာသာ၌ မီးရထားလမ်းဖောက်သည် ဟု ရေးလျှင် အဓိပ္ပါယ်ပြည့်စုံနေပါလျက် အဘယ်ကြောင့် မီးရထားလမ်းသွယ်တန်းဖောက်လုပ်သည်ဟု ဆိုလိုပါသနည်း" ဟု ဆရာကြီးက မြန်မာတို့၏ လေကြောရှည်ခြင်း ရိုးရာ အစဥ်အလာတစ်ခုကို ဖော်ပြထားခဲ့သည်။

အရှက်တရား အလွဲများ –

         ဒီအကြောင်းအရာလေးကတော့ ကျွန်တော်တို့ ရွှေမြန်မာများ၏ အထင်ရှားဆုံး ရိုးရာအလွဲတစ်ခုပင် ဖြစ်နေသည်မှာ ပြောစရာပင်မလိုတော့ပါ။ လက်ရှိ ကျွန်တော်တို့မြန်မာလူမျိုး အများစု ကျင့်သုံးနေကြသော "ဟိရီ" ဟူသည့် အရှက်တရားသည် တလွဲဖြစ်နေသည်။ တွေ့နေကြရပါသည်။ လမ်းပေါ်တွင် အမှိုက်ပစ်သွားသည့်လူတစ်ယောက်ကို အထူးအဆန်းလုပ်၍ ကြည့်မနေတော့ဘဲ ထိုအမှိုက်ကို ကောက်၍ အမှိုက်ပုံးထဲသို့ ထည့်လိုက်သော လူကို လူထူးဆန်းဟု မှတ်ယူနေကြသည်။ သူငယ်ချင်း အပေါင်းအသင်းများအကြားရောက်လျှင် မသောက်မစားတတ်သူကို ဝိုင်း၍ လှောင်ကြသည်။ သောက်တတ်စားတတ်ပါမှ ဂုဏ်ရှိသည် ။ မသောက်တတ်မစားတတ်ပါက ရှက်စရာကောင်းသည်ဟု ထင်မြင် ဝေဖန်ကြသည် ။ တွေ့ကြရပါသည်။ လက်ရှိတွင် ဖေ့စ်ဘွတ် ပေါ်တွင် ဆယ်ကျော်သက်မိန်းကလေးအများစုမှာ လက်ခလယ်ထောင်လိုက် ဆဲလိုက်နှင့် ထိုအပြုအမူကိုပင် မှန်သည်ဟု ဂုဏ်ယူနေကြသေးသည်။ ထိုသို့လက်ခလယ်မထောင်တတ် မဆဲတတ်ပါလျှင် ရှက်စရာဟု မှားယွင်းစွာ ထင်မြင်နေကြသည်။ ​သည်အကြောင်းပြောနေရသည်မှာ စိတ်တော့မကောင်းလှပေ ။ သို့သော် ကောင်းစေချင်လွန်း၍ အမုန်းခံကာ ရေးနေရခြင်းဖြစ်သည်ကို နားလည်ကြစေချင်သည်။

 

အမှိုက်ပစ်ရမှာကို မရှက် ၊ အမှိုက်ကောက်ရမှာကို ရှက်သည် ။ သောက်တတ်စားတတ်မှာကို မရှက်၊ မသောက်တတ်မစားတတ်မှာ

ကို ရှက်ကြသည်။ လက်ခလယ်ထောင် ဆဲတတ်မှာကို မရှက်၊ လက်ခလယ်မထောင် မဆဲတတ်မှာကို ရှက်ကြသည်။ မိုးခါးရေ သောက်မိမှာကို မရှက် ၊ မိုးခါးရေ မသောက်မိမှာကို ရှက်ကြသည်။

ထိုရိုးရာများသည် တလွဲဆံပင်ကောင်းနေသော ရိုးရာအလွဲများသာဖြစ်သည်ကို ကျွန်တော်တို့ ရွှေမြန်မာတို့ အနည်းငယ်မျှ သဘောပေါက်သွားလျှင်ပင် ကျွန်တော်ရေးရကျိုးနပ်ပါပြီ။ ထိုရိုးရာအလွဲများသည် "တို့များရိုးရာ တို့ရိုးရာ " ဟု ဂုဏ်ယူဝင့်ကြွား ကြွေးကြော်ကာ နေရမည့် ရိုးရာများမဟုတ်လှ ။ လုံးဝ ပြင်ဆင်ပြောင်းလဲကြရမည့် ရိုးရာအလွဲများဖြစ်ကြောင်းကို နားလည်သိရှိ သဘောပေါက်စေလို

သော ဆန္ဒမွန်ဖြင့်...........။

#ဘုန်းလူမော် (မြန်မာစာ)